ravings of a lunatic: Unpublished I

Unpublished I

Miðvikudagur, 28. mars 2007

Vonandi er starfsheitið listamaður ekki lögverndað því þegar ég vaknaði í morgun rann upp fyrir mér ljós. Ég er listamaður. Í hvert sinn sem gerðar verða athugasemdir við hátterni mitt eða klæðaburð hér eftir, þá segi ég: "Já, nei... ég má þetta alveg. Ég er sko listamaður."

Ég er það líka í alvörunni. Stundum þegar ég er í froðubaði bý ég til hitt og þetta rosalega flott og listrænt úr froðunni. Einu sinni þá sletti ég froðunni rosalega listamannalega á vegginn og það var alveg eins og listaverk. Listamenn eru með svo mikla tjáningarþörf. Ég hef líka eldað listaverk. Það var mikið myrkur yfir því og drungi. Ég kallaði það: "Útbrunnin húsmóðir" og ætlaði að selja það á ebay en Tóti henti því í tiltektaræði einn laugardaginn. Hann hefur engan skilning á list.

Einu sinni hellti ég kókí í glas og hélt áfram að hella þangað til kókið flæddi uppúr glasinu og myndaði poll í kringum það. Ég tók mynd af glasinu og pollinum og skýrði hana: "Góðærið".
Það er list.

Stundum sit ég og er að gera eitthvað alveg saklaust eins og að klippa á mér táneglurnar og þá dettur mér eitthvað orð í hug sem engum hefur dottið í hug áður. Þá hætti ég að klippa táneglurnar, í smá stund, fer í hvildarstellingu og hugleiði til að varðveita augnarblikið.

| anna | 0:08 |

comments

Bíddu, hefurðu - hefur einhver - einhvern tímann efast um að þú sért listamaður? Þó ekki væri nema fyrir þessa síðu ætti sú staðreynd að blasa við hverjum sem augu hefur í hausnum. Og ég bendi á að jafnvel blindir hafa (í a.m.k. 99% tilfella) augu í hausnum, þótt þau virki reyndar ekki sem skyldi. Og þetta hefur ekkert með útúrflóandi svart sýrópsglundur eða Góðæri að gera. Þessi síða er eitt allsherjar andskotans listaverk, helvítis listaspíran þín. Og nú er bara að sækja um styrk, einn tveir og koma svo...

Nr. 1 | posted by: Tumi | 28.03.2007 | 0:56:01 | [+] |

wahahahaha
Mundu bara að nota aldrei fullt nafn. Það er mjög ólistamannslegt.