ravings of a lunatic: Auðvitað

Auðvitað

Þriðjudagur, 11. apríl 2006

Ég fór áðan að kaupa skannann minn. Ég og afgreiðslustrákurinn gengum yfir í þann enda búðarinnar sem hann geymir þessi tól. Eftir stutta leit sagðist hann ekki eiga skannann sem ég vildi kaupa. Ég ákvað að segja ekkert, heldur gaf ég honum baneitrað augnarráð og byrjaði, hægt og rólega að kroppa ofanaf stærstu bólunni sem er á enninu á mér á meðan ég horfði á hann þessu óhugnarlega illskulega augnarráði.

Tveimur mínútum seinna hélt ég heim á leið með skannann minn.

Þá veit ég það.

Á leiðinni heim fattaði ég allt í einu! Ég ætla að hætta að bíða eftir að ég finni vondasta vondukallaendurskoðanda í heiminum. ÉG BÝ HANN BARA TIL! Og ég er búin að því.

Minn drauma endurskoðandi heitir King Accountant Calculus. Hann gengur um í svartri skikkju með svarta leðurhanska, gráum jakkafötum og í rauðum axlaböndum sem hann notar sem teygjubyssu til að skjóta eitruðum bréfaklemmum í óvini sína þannig að þeir lamast tímabundið á meðan King Accountant Calculus sagar af þeim útlim.

Ég elska hann en hann þolir mig ekki en alveg sama hvað hann reynir að koma mér fyrir kattarnef.. þá slepp ég alltaf og fyrir einhverja algjöra tilviljun og svoleiðis helli yfir hann ást og umhyggju þangað til hann gubbar og þarf að setja skikkjuna sína í hreinsun. Já. Allar sögurnar munu enda þannig: hann setur skikkjuna í hreinsun. Og í fatahreinsuninni vinnur sláni sem reykir og reynir að vera fyndinn í hvert einasta skipti sem hetjan mín mætir.

Honum mun aldrei takast það. Blessuðum manninum.

Fyrsta bókin í þessari hasarseríu, fyrsta af mörgum hundruðum, mun heita á íslensku:

Ævintýri endurskoðanda: uppgjörið.

| anna | 18:28 |