Ég hef á tilfinningunni að fiskiflugur séu lífseigari nú en hér á árum áður. Þá voru þær bara til trafala á sumrin, að mig minnir, en nú er maður að berjast við þær allan veturinn líka. Það er af sem áður var.

En það var annað sem ég vildi minnast á og vona að anna taki það ekki óstinnt upp þó það komi fiskiflugum ekki beint við.

Höfuðhögg hjá hárlausum

Það er nú varla í frásögur færandi en ég fór til Frakklands um daginn og lenti í rútuslysi. Það ætti ekki að koma mér á óvart miðað við þann tíma sem maður dvelur um borð í rútum í Frakklandi. Þetta atvikaðist þannig að ég og félagi minn vorum, einu sinni sem oftar, rétt komnir inn í rútuna og ég sestur þegar hann spyr hvort við eigum ekki að sitja nær aftari hurðinni. Ég tek hann á orðinu og stend upp og rek hausinn á kaf í hattahilluna. Það væri heldur ekki í frásögur færandi nema fyrir þær sakir að ég er alveg hárlaus. Sárið á höfðinu blasti því við öllum sem sjá vildu.

Þarna liggur hundurinn grafinn. Þegar maður er hárlaus og fær sár á hausinn þá er sífellt verið að benda manni á að maður sé með sár á höfðinu. Ef maður fær sár á fingurinn er það ekkert tiltökumál eða aftan á hnésbótina enda erfitt að koma auga á það. En sár á höfðinu er tilefni til ýmissa vangaveltna hjá gestum og gangandi. Það kallar á útskýringar og oftar en ekki þykist ég sjá vantrúarsvip hjá fólki þegar ástæðurnar eru tíundaðar.

Ég hef velt því fyrir mér hvort ég fengi óvenju oft sár á hausinn eða hvort raunin væri frekar sú að allir væri meira og minna að reka sig uppundir og því væri fólk alla jafna með sár á hausnum. Það bara sæist ekki fyrir hárinu.

Þessar vangaveltur tóku sig upp aftur í morgun. Þegar ég var búinn að lesa Moggann með kaffinu og brjóta saman þvottinn þá datt mér í hug að taka fram ryksuguna. Þegar ég beygji mig niður, sting snúrunni í samband og rís upp aftur þá rek ég hausinn á kaf í oddhvasst horn á næsta skáp - og fæ þetta líka fína sár á besta stað á höfðinu.

Framundan næstu daga eru því athugasemdir á borð við; "svakalegt sár ertu með á höfðinu" og ég svara "já, ég var að ryksuga".

Ó sorry, ruglaðist aðeins á íþróttagreinum. Júbbs ég er mest í "base fly" og nota oftast heimatilgerða kylfu. Annars eru þær svo slappar núna þessar elskur að það er næstum nóg að blása á þær. Nú eða ég svona andfúl... hm.