Hlusta á - Í Króatíu - mp3 4,40 MB

Ég er nýkomin frá Króatíu.

Nálægt hótelinu sem við bjuggum á var gamalt þorp þar sem maður fann kaupfélag af gömlu gerðinni, klassísk sölutjöld með túrista drasli og eldgömul hús við götur sem voru lagðar þegar rómarveldi var uppá sitt besta.

Ég var að ganga eftir einni slíkri götu daginn áður en ég fór heim þegar ég ákvað að fá mér sæti vegna þess að skórnir sem ég var í voru gjörsamlega að drepa mig. Háhælaðir sandalar sem ég hafði keypt á slikk. Á sama augnabliki og ég fékk mér sæti kom fugl og skeit á mig. Án gríns, það skeit á mig fugl. Nema hvað að rétt í því sem fuglinn lét vaða sá ég konu sitja í stól við eitt húsið. Það skrítna er.. ég hefði getað svarið fyrir það að hún var ekki þarna áður en fuglinn skeit á mig.

Hlusta á - Léttari - mp3 5,12 MB

Ég hef verið að léttast undanfarið ár. Sem mér finnst skrítið.. hélt að ég væri komin af léttasta skeiði.. svona getur lífið komið manni á óvart.

Fólk sem ég umgengst í vinnunni er farið að hafa orð á þessu. Margir spyrja mig hvað leyndarmálið sé. Er það herbalife? Hollywoodkúrinn? Svelti? Nei ég lýg því.. ég hef ekki fengið anorexíuspurninguna ennþá.. en fólk spyr og ég hef gefið þeim sama svarið hingað til... Það fara minnst sjö kíló við það að standa í hjónaskilnaði. En það eru farin helmingi fleiri en sjö.. og ég er ekki á herbalife. Hef einu sinni prufað herbalife te og fékk lítið út úr því annað en ofvirkni og einbeitingarskort, í þessa þrjá daga. Held ég hafi aldrei byrjað á jafn mörgu og hætt við fyrr á ævinni.. ljóta vitleysan.

Hlusta á - Þvottavélar - mp3 4,48 MB

Þegar fólk spyr mig hvort ég sé hrædd við eitthvað þarf ég ekki að hugsa mig lengi um áður en ég svara. Ég er sjúklega hrædd við þvottavélar.

Ekki það.. ég get alveg notað þvottavélar og ég get alveg sofið þó það sé þvottavél í íbúðinni, svo líklega er ekki alveg rétt að segja að ég sé hrædd við þvottavélarnar sjálfar, enda líta þær svosem sjaldnast eitthvað ógnvænlega út, en þegar þvottavél er í gangi er ég í krónísku kvíðakasti og líður eins og eitthvað hræðilegt sé yfirvofandi. Enda er í raun eitthvað hræðilegt yfirvofandi... fyrr eða síðar kemur að því að þvottavélin fari að vinda.